సుహాస్ ఇది వరకు చేసిన కలర్ ఫోటో ఓటీటీలో సెన్సేషన్‌గా నిలిచింది. రైటర్ పద్మభూషణ్ మీద కాస్త కాంట్రవర్సీ ఉంటుంది. కొందరు బాగుందని అంటే.. ఇంకొందరు పెదవి విరిచారు. దాని కలెక్షన్ల మీద కూడా కాస్త కాంట్రవర్సీ ఉంటుంది. కానీ సుహాస్ పర్ఫామెన్స్ మీద మాత్రం ఎలాంటి కంప్లైంట్ రాలేదు. అదే సుహాస్ సక్సెస్. ఇప్పుడు సుహాస్ మళ్లీ ఓ కథను ఆడియెన్స్‌కు చెప్పేందుకు వచ్చాడు. ఈ చిత్రాన్ని ధీరజ్ నిర్మించగా.. దుశ్యంత్ తన స్వీయ అనుభవాలు, తన ఊర్లో జరిగిన ఘటనల ఆధారంగా తీశాడు. మరి ఈ అంబాజీపేట మ్యారేజి బ్యాండు ఎలా ఉంది? ఆడియెన్స్‌ను ఏ మేరకు ఆకట్టుకుందన్నది ఓ సారి చూద్దాం.

కథ
అంబాజిపేటలో 2007 ప్రాంతంలో ఈ కథ జరుగుతుంది. ఊర్లో పెద్ద మనిషిగా చెలామణి అవుతుంటాడు వెంకట్ (నితిన్ ప్రసన్న). ఊర్లో సగం మంది వెంకట్ దగ్గర అప్పులు తీసుకుని వడ్డీలు కట్టుకుంటూ బతుకుతూనే ఉంటారు. ఆ గ్రామంలో మల్లి (సుహాస్) తన కులవృత్తిని చేసుకుంటూనే మ్యారేజి బ్యాండులో పని చేస్తుంటాడు. మల్లి అక్క పద్మ (శరణ్య) అదే ఊర్లో స్కూల్ టీచర్‌గా పని చేస్తుంటుంది. పద్మకు వెంకట్‌కు ఏదో ఉందని ఊరంతా పుకార్లు నడుస్తుంటాయి. వెంకట్ చెల్లి లక్ష్మీ (శివానీ), మల్లి ఇద్దరూ ఒకరినొకరు ప్రేమించుకుంటారు. కులం, డబ్బుని చూసుకుని అహంకారంతో రెచ్చిపోయే వెంకట్.. ఆత్మాభిమానంతో ఉండే మల్లి, పద్మలకు వైరం ఎలా మొదలవుతుంది? ఈ గొడవల్లో మల్లి, లక్ష్మీల ప్రేమ ఏం అవుతుంది? చివరకు వెంకట్ పరిస్థితి ఎంతలా మారిపోతుంది? అనేది కథ.

అంబాజీపేట సినిమాలో చూపించిన కథ కొత్తదేమీ కాదు. ఒకప్పుడు గ్రామాల్లో కులాల కుంపటి ఎలా ఉండేదో చెప్పనక్కర్లేదు. తక్కువ కులాలకు చెందిన వారిపై ఎంతటి వివక్ష చూపించేవారో అందరికీ తెలిసిందే. కుల వృత్తులు చేసుకునే వారి మీద ఎలాంటి చూపు చూసేవారో తెలిసిందే. కులాలు, పేదోళ్లు, ధనికులు, ప్రేమ అనే పాయింట్‌ల చుట్టూ ఎన్నో కథలు వచ్చాయి. ప్రేమ కథలు అంటే.. కులాలు, డబ్బు ఇలా ఏదో ఒకటి అడ్డు పడుతూనే ఉంటుంది. అయితే ఈ చిత్రం కేవలం ప్రేమ కథ కాదు. ప్రచార చిత్రాలు చూస్తే ఇది కేవలం ప్రేమ కథ అని అనుకుంటే పొరబాటు.

అసలు ఇది ప్రేమ కథా చిత్రమే కాదు. ఆత్మాభిమానం కోసం పోరాడే ఓ మహిళ కథ అని చెప్పొచ్చు. ఈ చిత్రానికి సుహాస్ హీరో అని పోస్టర్ల మీద కనిపిస్తుంది. కానీ సినిమా చూస్తే మాత్రం శరణ్య పోషించిన పద్మ పాత్రే హీరోలా అనిపిస్తుంది. మహిళను కేంద్రంగా చేసుకుని ఇంత బలమైన పాత్రను రాసుకోవడం ఈ మధ్య కాలంలో జరగలేదు. అసలు పద్మ పాత్రకు రాసుకున్న సీన్లు, డైలాగ్స్‌కు దర్శకుడికి దండం పెట్టాల్సిందే.

ఎలాంటి పరిస్థితి వచ్చినా ఆత్మాభిమానాన్ని వదలుకోలేమని పద్మ పాత్ర చెప్పే డైలాగ్స్ అద్భుతంగా అనిపిస్తాయి. చావనైనా చస్తాను అంటూ చావుకు సిద్దపడుతుంది కానీ.. ఆత్మాభిమానాన్ని వదులుకోదు. ఇక పోలీస్ స్టేషన్‌లో పద్మ యాక్టింగ్, యాక్షన్‌కు విజిల్స్ పడతాయి. పద్మే ఈ చిత్రానికి హీరోనా? అనిపిస్తుంది. పోలీస్ స్టేషన్‌లో విలన్‌ను ఎగిరి కాలితో తన్నే సీన్‌కు స్క్రీన్లు చిరిగిపోవాల్సిందే.

ఒక హీరోకు అలాంటి సీన్లు పెట్టడం కామన్‌గా చూస్తుంటాం. కానీ ఈ మూవీలో శరణ్యకు అలాంటి అదిరిపోయే సీన్లు పెట్టారు. అక్కడే దర్శకుడు పాస్ అవుతాడు. ఇలాంటి విలేజ్ లవ్ రివేంజ్ డ్రామాలను ఇది వరకు కొన్ని వందల సినిమాలు చూసి ఉంటాం. కానీ ఎప్పుడూ కూడా ఓ లేడీ కారెక్టర్‌ను ఇంత పవర్ ఫుల్‌గా చూపించలేదు.

ఫస్ట్ హాఫ్ ప్రారంభం కాస్త స్లోగా అనిపిస్తుంది. ప్రేమ కథ ప్రారంభం అయినప్పటి నుంచి యూత్‌ బాగానే కనెక్ట్ అవుతారు. కథ ముందుకు వెళ్తున్న కొద్ది కాస్త సీరియస్‌గా సాగుతుంది. ఇంటర్వెల్‌కు పీక్స్‌కు చేరుతుంది. ద్వితీయార్దం కూడా అంతే ఎమోషనల్‌గా సాగుతుంది. అలా ఏదో చప్పగా సాగుతున్న టైంలోనే హైకి చేరుతుంది. పోలీస్ స్టేషన్ సీన్ అద్భుతంగా అనిపిస్తుంది. ఆ తరువాత మళ్లీ కాస్త నెమ్మదించినట్టుగా అనిస్తుంది. క్లైమాక్స్‌ను రొటీన్‌కు భిన్నంగానే రాసుకున్నాడు. చంపడం పరిష్కరం కాదని, మనలాంటి వాళ్లు చంపితే హంతుకుడే అంటారు అంటూ హీరో చెప్పే డైలాగ్స్ అద్భుతంగా ఉంటాయి. గౌరవం, పేరు తరువాత గారు రావడానికి ఎంత కష్టపడాలో అంటూ పద్మ చెప్పే డైలాగ్స్ బాగున్నాయి. పద్మ పాత్రకు సినిమా మొత్తం కూడా మంచి డైలాగ్స్ పడ్డాయి.

సాంకేతికంగా ఈ చిత్రం ఎంతో ఉన్నతంగా కనిపిస్తుంది. పాటలు థియేటర్లో వింటుంటే డ్యాన్సులు వేయాల్సిందే. ఆర్ఆర్ స్క్రీన్ మీదున్న ఎమోషన్‌ను వందరెట్లు పెంచినట్టుగా అనిపిస్తుంది. విజువల్స్ ఎంతో సహజంగా ఉన్నాయి. సినిమాను చూస్తుంటే పెద్దగా ఖర్చు కూడా పెట్టలేదనిపిస్తుంది. అనవసరపు హంగులకు పోయి బడ్జెట్‌ను పెంచుకోలేదని అర్థం అవుతోంది. కంటెంట్‌ను నమ్మి సినిమాను తీస్తే హిట్టవుతుందని, అందరినీ ఆకట్టుకుందని మరోసారి నిరూపించారు.

సుహాస్ కథను అద్భుతంగా ముందుకు తీసుకెళ్లాడు. నవ్వించాడు.. ఏడ్పించాడు.. చివర్లో ఎమోషన్స్, నటనతో అందరినీ ఆకట్టుకున్నాడు. ప్రీ క్లైమాక్స్, క్లైమాక్స్‌లో అద్భుతంగా అనిపించాడు. ఇలాంటి కంటెంట్ ఉన్న చిత్రాలు చేస్తే సుహాస్‌కు ఇక తిరుగుండదనిపిస్తుంది. శివాని పోషించిన పాత్ర కూడా బాగానే ఉంది. విలన్‌గా నటించిన నితిన్ ప్రసన్న తన పాత్రకు న్యాయం చేశాడు. చివర్లో అలా కనిపించేందుకు ఒప్పుకున్నందుకు, ఆ డేరింగ్‌కు హ్యాట్సాఫ్ చెప్పాల్సిందే. జగదీష్‌కు మంచి పాత్ర పడింది. పుష్ప కేశవ తరువాత ఈ సంజీవ్ కారెక్టర్‌ కూడా గుర్తుండిపోతుంది. అన్ని పాత్రలకు తగిన ప్రాధాన్యం ఉండటమే విశేషం.

బాటమ్ లైన్ అంబాజీపేట మ్యారేజీ బ్యాండు.. ఎమోషన్స్ మెండు

By Ttimes

స్పందించండి